အထူးဂရန် ဆိုတာ
☆ အကြောင်းကြောင်းကြောင့် ပါမစ်တို့၊ စလစ်တို့ ခိုင်ခိုင်မာမာ မရှိသော်လည်း “လူနေထိုင်ခွင့်ရှိတဲ့မြေ” မှာ နေထိုင်ကြတဲ့လူတွေကို ထုတ်ပေးနိုင်တဲ့ဂရန်မျိုး ဖြစ်ပါတယ်။
☆ မီးလောင်ပြင်က လူအချို့၊ ရေတိုက်စားလို့နေရာရွှေ့ နေထိုင်ကြရတဲ့လူအချို့တို့ဟာ ယာယီပါမစ်တွေနဲ့နေကြရပါတယ်။ သူတို့တွေလည်းရနိုင်ကြပါတယ်။
☆ မြို့တော်စည်ပင် (သို့) အိုးအိမ်ဦးစီးဌာန တို့ကထုတ်ပေးနိုင်ပါတယ်။
☆ အထူးဝန်ဆောင်ခတော့ ပေးကြရပါတယ်။ ကျန်တဲ့ကိစ္စ တွေကတော့ အတူတူပါပဲ။
☆ တစ်ကယ်တော့ အထူးဂရန်ဆိုတာ ရန်ကုန်မြို့တော့စည်ပင်သာယာရေးကော်မတီ၏ အမိန့်၃/၂၀၀၁၊ အခန်း(၅)၊ အပိုဒ် (၂၃) မှာ စီမံပိုင်ခွင့်များကို ရှင်းလင်းစွာ ခွင့်ပြုထားပါတယ်။
☆ မြို့တော်စည်ပင်သာယာရေးကော်မတီရဲ့ မြေယာမူဝါဒ၊ မြေအသုံးချခြင်းဆိုင်ရာစီမံချက်များကိုလည်း မထိခိုက်နိုင်တဲ့မြေနေရာတွေ ဖြစ်မယ်ဆိုလျှင်။
☆ ဂရန်၏ စည်းကမ်းချက်များ ပြီးပြည့်စုံခြင်းမရှိသော်လည်း လျော့ပေါ့သတ်မှတ်၍ အထူးဂရန်ထုတ်ပေးနိုင်ပါသည်။
အထူးဂရန်ပေးရာမှာ မြေဧရိယာဟာ (၁၀၀၀၀) စတုရန်းပေထက် မကျယ်စေရပါ။ (၁၂၀၀) စတုရန်းပေထက် မကျဉ်းရပါ။ (၁၂၀၀) စတုရန်းပေထက် ကျဉ်းသော်လည်း အမှန်တကယ်အိမ်ရှိပြီး နေထိုင်နေပါက ခြွင်းချက်ဖြင့် ခွင့်ပြုပေးနိုင်ပေမယ့် (၁၀၀၀၀) စတုရန်းပေထက် လုံးဝကျယ်လို့ မရပါဘူး။
လူနေရပ်ကွက်များအတွင်း နောင်တချိန် ကစားကွင်း၊ ပန်းခြံ၊ ဓမ္မာရုံ၊ ဈေး၊ Recreation Center တည်ဆောက်ရန် ချန်ထားတဲ့ မြေကွက်လွတ်များ မဖြစ်ရပါ။ Public Utilities များထည့်သွင်း မြှုပ်နှံရန် ချန်လှပ်ထားတဲ့ မြေ များမဖြစ်ရပါ။
ပြင်ဆင်ထိန်းသိမ်းရန်အတွက် ကမ်းဖူးမြေ၊ ဆိပ်ကမ်းမြေ၊ မြစ်ကမ်းဘေး လူအများ စိတ်ကြည်လင်စွာ ခံစားနိုင်ရန် ချန်လှပ်ထားတဲ့ Free Space များ မဖြစ်ရပါ။
အချို့က ဒဂုံမြို့သစ်၊ ရွှေပြည်သာ၊ လှိုင်သာယာ၊ ရွှေပေါက်ကံ မြို့သစ်များ အတွင်း လူနေရပ်ကွက်ပေါ်မှာ ကျန်ရှိနေတဲ့ (၂) ဧက (၃) ဧက မှ (၇) ဧက (၈) ဧက အထိ မြေကွက်လွတ်အကျန်တွေကို မူလပိုင်ရှင် လယ်သမားထံ ကနေ ဝယ်ယူပြီး ၎င်းမြေကွက်ကြီးကို အထူးဂရန်ပေးပါ ဆိုပြီး လျှောက်ထား လာတာတွေ ရှိလာပါတယ်။
ဒါ့အပြင် မြစ်ကြောင်းထိန်းသိမ်းရေးအတွက် အကွက်မရိုက်ဘဲ ချန်ထားတဲ့ ကမ်းနဖူးမြေ၊ ဆိပ်ကမ်းမြေတွေကို အထူးဂရန်လျှောက်ကြတာတွေ ရှိပါတယ်။ တချို့က တောင်ဥက္ကလာ၊ မြောက်ဥက္ကလာ၊ သာကေတရပ်ကွက်မှာ Free Space အဖြစ်ထားရှိတဲ့ မြေကွက်တွေကို အထူးဂရန် လာရောက် လျှောက်ထားကြသူတွေလည်း ရှိပါတယ်။
ဒါပေမဲ့ လူနေရပ်ကွက်တွေမှာ ဂရန်မြေမူရင်းရှိ ပေ (၆၀× ၈၀) မြေကွက်ဖြစ်ပေမဲ့ အစွန်ဆုံးအိမ်တွေဟာ ဘေးမြေပိုတွေကို ထည့်သွင်း အသုံးပြုထားကြတာ တွေလည်း ရှိပါတယ်။ ၎င်းအခြေအနေမျိုးကိုလည်း ဆက်စပ်မြေပိုကို အထူးဂရန်လျှောက်ထားခွင့်ပြုပြီး အထူးဂရန်လျှောက်ထားပေးတာမျိုးလည်း ရှိပါတယ်။
Credit to: Kumudra
